पठन संस्कृतिको अभावले समाज अराजकतातिर : सभामुख घर्ती
0
0
बुटवल । लुम्बिनी प्रदेशका सभामुख तुलाराम घर्ती मगरले पुस्तक अध्ययन गर्नेहरू कम हुँदै जाँदा समाज अराजकतातिर गइरहेका बताएका छन् । छोटो र हल्का सूचना भएका व्यक्तिहरूले भन्दा पुस्तक अध्ययन गरेका व्यक्तिहरूले समाजमा महत्त्वपूर्ण योगदान दिन सक्ने विभिन्न अध्ययनले देखाएको उनको भनाई छ ।
शनिबार लुम्बिनी वाङ्मय प्रतिष्ठान रुपन्देहीको आयोजनामा साहित्यकार छविलाल पाठकले लेखेको कृति धौलागिरि छायामुनि नामक पुस्तक विमोचन गर्दै उनले पठन संस्कृतिको अभावमा समाज अराजकता तर्फ गइरहेको बताउँदै समाजलाई सकारात्मक दिशातर्फ लैजान साहित्यकारहरूको भूमिका आवश्यक रहेको औँल्याए।
लेखक साहित्यकार छविलाल पाठकले धौलागिरि छायामुनि पुस्तक १० कक्षा अध्ययन गर्दाको अवस्थाको बारेमा वृत्तान्त लेखिएको उल्लेख गरे। उनले दस्ताबेजको रूपमा यसलाई लिइएको उनले बताए। सरकारी सेवाबाट अवकाश प्राप्त पाठक विभिन्न क्षेत्रमा साहित्य कलम चलाउँदै आएका थिए।
कार्यक्रममा संविधान सभा सदस्य नेत्र पन्थी , टिप्पणीकार ऋषिराम भुसाल, वरिष्ठ अधिवक्ता तेज प्रसाद कँडेल, समीक्षक एवं लुम्बिनी बाङ्मय प्रतिष्ठानका केन्द्रीय अध्यक्ष ऋषि आजाद, प्रेस स्वतन्त्रता सेनानी डा बालकृष्ण चापागाईँ, साहित्यकारहरू दल बहादुर गुरुङ ,राजेन्द्र कुमार आचार्य लगायतले पुस्तकको गहिराइको बारेमा उल्लेख गरेका थिए। २८१ पृष्ठ लामो पुस्तक इन्डिगाे ईन्क प्रालि काठमाडौँले प्रकाशन गरेको हो।
प्रतिकृया दिनुहोस्