लुम्बिनी प्रदेश सभाको बैठक सुरु

बुटवल । लुम्बिनी प्रदेश सभाको सातौँ (हिउँदे) अधिवेशन सुरु भएको छ। अधिवेशनको पहिलो बैठक दिउँसो १ बजे सुरु हुने भनिए पनि केही बेरअघि मात्रै बैठक प्रारम्भ भएको हो।

कार्यसूचीअनुसार सभामुखले प्रदेश प्रमुखको कार्यालयबाट प्राप्त तीनवटा पत्र पढेर सुनाउने छन्। यसमा मन्त्रिपरिषद् पुनर्गठनसम्बन्धी पत्र तथा छैठौँ अधिवेशनबाट पारित भई प्रमाणीकरण भएका विधेयकसम्बन्धी पत्रहरू समावेश छन्।

त्यसपछि दलगत तर्फबाट प्रदेश सभा सदस्यहरूले शुभकामना मन्तव्य राख्ने कार्यक्रम रहेको छ। लुम्बिनीमा गत भदौ ३१ गते छैठौँ अर्थात् वर्षे अधिवेशन अन्त्य भएको थियो।