शुद्धोधनको यज्ञोदयमा नेविसंघ विजयी

भैरहवा। स्वतन्त्र विद्यार्थी युनियन (स्ववियु) निर्वाचनमा रुपन्देहीको यज्ञोदय दुधनाथ थारु बहमुखी क्याम्पसमा नेपाल विद्यार्थी संघ (नेविसंघ) को प्यानल नै विजयी भएको छ । जिल्लाको शुद्धोधन गाउँपालिका–३ रमुवापुरस्थित रहेको क्याम्पसमा आदेश रानाको नेतृत्वमा चुनावी मैदानमा उत्रिएको नेविसंघको टीमले अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु), अनेरास्वविय क्रान्तिकारी र अनेरास्वविय समाजवादीको संयुक्त टीमलाई पराजित गर्दै प्यानल नै विजयी भएको हो ।

नेविसंघका राना ३ सय १५ मत ल्याएर सभापतिमा निर्वाचित भएका छन् । यस्तै, सचिवमा नेविसंघकै रम्भा थारुले ३ सय ९ मत ल्याएर विजयी भइन् भने कोषाध्यक्षमा ३ सय २३ मत ल्याएर माधवकुमार कंडेल निर्वाचित भएको निर्वाचन अधिकृत भीमप्रसाद सापकोटाले बताए ।

संयुक्त प्यानलकी साझा उम्मेदवार अञ्जिता चौधरीले १ सय ४४ मत प्राप्त गरिन् । ५ सय ५० मतदाता रहेको यज्ञोदयमा ४ सय ६७ मत खसेको थियो ।